Exo 3 | NdeIBE | STEP | Kwathi uMosi eselusa izimvu zikayisezala uJethro, umphristi waseMidiyani, waseqhuba izimvu zaya kude le kwenkangala eHorebhi, intaba kaNkulunkulu.

Exodus 3

UMosi lesixuku esivutha umlilo

1 Kwathi uMosi eselusa izimvu zikayisezala uJethro, umphristi waseMidiyani, waseqhuba izimvu zaya kude le kwenkangala eHorebhi, intaba kaNkulunkulu. 2 Lapho-ke ingilosi kaJehova yabonakala kuye iphakathi kwamalangabi omlilo esixukwini. UMosi wabona ukuthi loba isixuku sasibhebha asizange sitshe silobe.

3 Ngakho uMosi wacabanga esithi, “Ngizasondela ngiyebona isimanga lesi ukuba kungani isixuku singatshi silobe.”

4 Kwathi uJehova ebona ukuthi usesondele ukuba ayekhangela, uNkulunkulu wasemmemeza ngelizwi elaliphuma kulesosixuku wathi, “Mosi! Mosi!” UMosi wathi, “Ngilapha.”

5 UNkulunkulu wathi, “Ungasondeli. Khupha amanyathela akho, ngoba indawo omi kuyo ingumhlabathi ongcwele.” 6 Wasesithi njalo, “NginguNkulunkulu kayihlo, uNkulunkulu ka-Abhrahama, uNkulunkulu ka-Isaka loNkulunkulu kaJakhobe.” Ngalokhu uMosi wafihla ubuso bakhe ngoba wayesesaba ukukhangela uNkulunkulu.

7 UJehova wasesithi, “Impela ngilubonile usizi lwabantu bami eGibhithe. Ngibazwile bekhala ngenxa yezinduna zezigqili ezibacindezelayo, njalo ngiyaphisekela ukuhlupheka kwabo. 8 Ngakho ngehlile ukuzabakhulula ezandleni zamaGibhithe ngibakhuphe kulelolizwe ngibase elizweni elilendawo enengi, ilizwe eligeleza uchago loluju endaweni yamaKhenani, amaHithi, amaAmori, amaPherizi, amaHivi lamaJebhusi.

9 Ukukhala kwabako-Israyeli sekufikile kimi, njalo sengibonile lendlela amaGibhithe abahlukuluza ngayo. 10 Ngakho suka uhambe. Ngikuthuma kuFaro ukuthi uyekhupha abantu bami abako-Israyeli elizweni laseGibhithe.”

11 Kodwa uMosi wathi kuNkulunkulu, “Kambe ngingubani ukuba ngiye kuFaro ukuyakhupha abako-Israyeli elizweni laseGibhithe na?”

12 UNkulunkulu wasesithi, “Ngizakuba lawe. Lesi sizakuba yisibonakaliso sokuthi yimi engikuthumileyo: Nxa usubakhuphile abantu eGibhithe, lizakhonza uNkulunkulu kuyonale intaba.”

13 UMosi wathi kuNkulunkulu, “Aluba ngifika kwabako-Israyeli ngithi kubo, ‘UNkulunkulu waboyihlo ungithumile kini,’ babe sebengibuza besithi, ‘Ungubani ibizo lakhe?’ ngizakuthini kubo?”

14 UNkulunkulu wathi kuMosi, “NGINGUYE ENGINGUYE. Lokhu yikho ozakutsho kwabako-Israyeli ukuthi, ‘UNGINGUYE ungithumile kini.’ ”

15 UNkulunkulu wabuye wathi kuMosi, “Tshono kwabako-Israyeli uthi, ‘UJehova, uNkulunkulu waboyihlo – uNkulunkulu ka-Abhrahama, uNkulunkulu ka-Isaka, loNkulunkulu kaJakhobe – ungithumile kini.’ Leli libizo lami laphakade, ibizo engizakhunjulwa ngalo kusukela kusizukulwana kusiya kwesinye isizukulwana.

16 “Hamba uyebuthanisa abadala bako-Israyeli uthi kubo, ‘UJehova, uNkulunkulu waboyihlo – uNkulunkulu ka-Abrahama, lo-Isaka loJakhobe, ubonakele kimi wathi: Ngibe ngilikhangele njalo ngikubonile okwenziwe kini eGibhithe. 17 Futhi ngithembisile ukulikhupha osizini lweGibhithe ngilise elizweni lamaKhenani, amaHithi, ama-Amori, amaPherizi, amaHivi lamaJebhusi, ilizwe eligeleza uchago loluju lwenyosi.

18 “Abadala bako-Israyeli bazakulalela. Kuzakuthi wena kanye labadala liye enkosini yaseGibhithe lithi kuyo, ‘UJehova, uNkulunkulu wamaHebheru uhlangane lathi. Sivumele sithathe uhambo lwezinsuku ezintathu siye enkangala ukuyanikela imihlatshelo kuJehova uNkulunkulu wethu.’ 19 Kodwa ngiyakwazi ukuthi inkosi yaseGibhithe ayiyikulivumela ukuthi lihambe ngaphandle kokuba icindezelwe yisandla esilamandla. 20 Ngakho ngizakwelula isandla sami ngiwatshaye amaGibhithe ngazo zonke izimanga engizazenza phakathi kwawo. Ngemva kwalokho, izalivumela lihambe.

21 “Njalo ngizakwenza amaGibhithe abe lomusa kulababantu, ukuze kuthi mhla lisuka lingahambi lingaphethe lutho.

22 Wonke owesifazana kacele kumakhelwane wakhe lakuye wonke owesifazana ohlala endlini yakhe izinto ezililigugu ezenziwe ngesiliva legolide kanye lezigqoko ezizagqokwa ngamadodana lamadodakazi enu. Ngaleyondlela lizawephuca impahla amaGibhithe.”